+856 030 5011-871 nith01aplus@gmail.com
APL+ ປະຊຸມສະຫຼຸບຜົນການຈັດຕັ້ງກິດຈະກຳຜ່ານມາ ແລະ ລະດົມຄວາມຄິດ ເພື່ອສຶບຕໍ່ໂຄງການໃນໄລຍະຕໍ່ໄປ.

APL+ ປະຊຸມສະຫຼຸບຜົນການຈັດຕັ້ງກິດຈະກຳຜ່ານມາ ແລະ ລະດົມຄວາມຄິດ ເພື່ອສຶບຕໍ່ໂຄງການໃນໄລຍະຕໍ່ໄປ.

ກອງປະຊຸມສະຫຼຸບສັງລວມຜົນການຈັດຕັ້ງປະຕິບັດກິດຈະກຳຂອງສະມາຄົມເຄືອຂ່າຍຜູ້ຕິດເຊື້ອເຮສໄອວີ/ເອດ ໃນໂຄງການ “ຊຸມຊົນເປັນເຈົ້າການເພື່ອການໂຕ້ຕອບພະຍາດໂຄວິດ-19” ປະຈຳປີ ໄດ້ຈັດຂື້ນໃນວັນທີ 4 ພຶດສະພາ 2022 ທີ່ ເມືອງຫິນບູນ ແຂວງຄຳມ່ວນ.
 
ໃນທີ່ປະຊຸມຄັ້ງນີ້ ໃຫ້ກຽດເປັນຄະນະປະທານມີ ທ່ານ ດຣ.ສົມຈິດ ອຳພິລາວົງ ຮອງຫົວໜ້າພະແນກສາທາລະນະສຸກແຂວງ ທ່ານ ດຣ.ຄຳສົມຕາ ອິນແປງມະນີ ຫົວໜ້າຫ້ອງການສາທາລະນະສຸກເມືອງ ແລະ ທ່ານ ຄຳພະນາວັນ ໄຊຍະຈັກ ຮອງຫົວໜ້າຂະແຫນງຄອບຄຸມພະຍາດຕິດຕໍ່ ແລະ ພະຍາດຕິດຕໍ່ທາງເພດສຳພັນແຂວງ ວິຊາການຈາກໜ່ວຍງານທີ່ກ່ຽວຂ້ອງ ອຳນວຍການສະມາຄົມ ພ້ອມດ້ວຍ ຕາງໜ້າຈາກພະແນກສາທາ ພະແນກແຮງງານ ເມືອງ ແຂວງ ນາຍບ້ານ ອຳນວຍການໂຮງຮຽນ ອາສາສະໝັກເຂົ້າຮ່ວມຢ່າງພ້ອມພຽງ.
 
ການຈັດກອງປະຊຸມໃນຄັ້ງນີ້ ກໍເພື່ອສະຫຼູບຜົນການປະຕິບັດໂຄງການ ຢູ່ເມືອງຫິນບູນ 5 ບ້ານ ແລະ ເມືອງຍົມມະລາດ 5 ບ້ານ ທັງໝົດ 10 ບ້ານ ທີ່ສະມາຄົມໄດ້ຈັດຕັ້ງສຳເລັດຕາມແຜນໂຄງການ ເຊິ່ງເປັນໂຄງການເພື່ອປູກຈິດສຳນຶກໃຫ້ຊຸມຊົນໃນການປ້ອງກັນການແຜ່ລະບາດຂອງພະຍາດໂຄວິດ ເພື່ອຍົກສູງຄວາມຮູ້ຄວາມສາມາດໃຫ້ແກ່ອາສາສະໝັກບ້ານກ່ຽວກັບການຕ້ານ ແລະ ສະກັດກັ້ນພະຍາດໂຄວິດ ພ້ອມທັງສາມາດສົ່ງຕໍ່ຄວາມຮູ້ໃຫ້ແກ່ປະຊາຊົນໄດ້.ໂດຍກິດຈະກຳຫຼັກໆທີ່ພວກເຮົາໄດ້ຈັດຕັ້ງຜ່ານມາ ບໍ່ວ່າຈະເປັນການລົງເກັບກຳຂໍ້ມູນ ການລົງໂຄນະນາໃຫ້ຄວາມຮູ້ກ່ຽວກັບໂຄວິດ-19 ແລະ ການສ້າງອ່າງລ້າງມືໃຫ້ໂຮງຮຽນ ແມ່ນສຳເລັດໄດ້ເກີນ 100%. ແຕ່ແນວໃດກໍດີ.ໃນບາງພື້ນທີ່ ບາງກິດຈະກຳຍັງມີຂໍ້ສະດວກ ຂໍ້ຍຸ້ງຍາກ ສິ່ງທ້າທາຍ ແລະ ບົດຮຽນທີ່ເຮົາຖອດຖອນໄດ້ ເພື່ອການປັບປຸງໃນໄລຍະຕໍ່ໄປ.
 
ໂດຍ ພາຍຫຼັງການນຳສະເໜີຜົນຂອງໂຄງການ ຄະນະໃນທີ່ປະຊຸມ ຕາງໜ້າ ແລະ ຕົວແທນທຸກຄົນ ໄດ້ຮ່ວມກັນລະດົມຄວາມຄິດ ສະແດງຄວາມເຫັນ ເຖິງສິ່ງໄດ້ຮັບ ແລະ ຄວາມຄາດຫວັງ ເພື່ອການຍາດແຍ່ງເອົາທຶນຮອນຈາກສາກົນ ແລະ ປັບປຸງໃນການຈັດຕັ້ງປະຕິບັດກິດຈະກຳຂອງພວກເຮົາໃນໄລຍະຕໍ່ໄປໃຫ້ດີຂື້ນ.
 
ໃນຕອນທ້າຍ ຄະນະປະທານ ກໍໄດ້ສະແດງຄວາມຍິນດີ ຊົມເຊີຍ ໃນການຈັດຕັ້ງກິດຈະກຳຜ່ານມາຂອງສະມາຄົມ ພາຍໃຕ້ໂຄງການທີ່ໄປສ້າງໃຫ້ນັ້ນ ຂໍໃຫ້ ອສບ ຫຼື ນາຍບ້ານມີການນຳໃຊ້ ແລະ ປົກປັກຮັກສາຊ່ວຍກັນ ລວມທັງເສີມຂະຍາຍຫົວຄິດປະດິດສ້າງສິ່ງທີ່ມີປະໂຫຍດ.ໂດຍສະເພາະ ເລື່ອງການໂຕ້ຕອບພະຍາດໂຄວິດ ການຫຍິບຜ້າອັດປາກ ການສ້າງອ່າງລ້າງມື ການໂຄນະນາສ້າງຈິດສຳນຶກໃນຊຸມຊົນ ກິດຈະກຳເຫຼົ່ານີ້ ເຫັນວ່າມີຜົນປະໂຫຍດຫຼາຍໃນສະພາບປະຈຸບັນ.
3 ສະມາຄົມລົງພື້ນທີ່ເປົ້າໝາຍຈັດກອງປະຊຸມແນະນຳໂຄງການໃຫມ່

3 ສະມາຄົມລົງພື້ນທີ່ເປົ້າໝາຍຈັດກອງປະຊຸມແນະນຳໂຄງການໃຫມ່

ວັນທີ 28 ເມສາ 2022 ສະມາຄົມເຄືອຂ່າຍຜູ້ຕິດເຊື້ອເຮສໄອວີ/ເອດ (ສຄອ) ຮ່ວມກັບ ສະມາຄົມເພື່ອການສະໜັບສະໜູນ ແລະ ປັບປຸງຊົນນະບົດ ແລະ ສະມາຄົມຊ່ວຍເຫຼືອຟື້ນຟູຄຸນນະພາບຊີວິດ ໄດ້ຈັດຕັ້ງປະຕິບັດກິດຈະກຳຂອງ “ໂຄງການຮ່ວມມືເພື່ອການປັບປຸງວຽກງານໂພຊະນາການຂອງຊຸມຊົນທີ່ມີຄວາມສ່ຽງດ້ານການຂາດສານອາຫານ” ໂດຍການຈັດກອງປະຊຸມແນະນຳ ແລະ ແລະ ປຶກສາການຈັດຕັ້ງກຸ່ມສົ່ງເສີມແມ່ຍິງຂັ້ນບ້ານທີ່ຫ້ອງວ່າການປົກຄອງ ເມືອງໄຊຈຳພອນ ແຂວງບໍລິຄຳໄຊ.   
 
ເຊິ່ງໃນທີ່ປະຊຸມພາກເຊົ້າ ໃຫ້ກຽດເປັນປະທານຂອງທ່ານ ກອງສີ ໄຊຍະວົງ ຄະນະປະຈຳພັກເມືອງ ຮອງເຈົ້າເມືອງໄຊຈຳພອນ, ດຣ.ນາງຄູນວິໄລ ໄຊຍະຈັກ ກຳມະການພັກເມືອງ ຫົວຫນ້າຫ້ອງການສາທາເມືອງ ພ້ອມດ້ວຍຕ່າງໜ້າຜູ້ໃຫ້ທຶນ ຫົວຫນ້າສະມາຄົມ ຕ່າງໜ້າໂຮງໝໍເມືອງ ແລະ ໂຮງໝໍນ້ອຍ ຕ່າງໜ້າຄະນະບ້ານ ຈາກ 17 ບ້ານພາຍໃນເມືອງເຂົ້າຮ່ວມ ທັງໝົດ 47 ຄົນ ຍີງ 15 ຄົນ.
 
ການຈັດກອງປະຊຸມໃນຄັ້ງນີ້ ກໍເພື່ອຮ່ວມມືປັບປຸງວຽກງານໂພສະນາການຂອງຊຸມຊົນທີ່ມີຄວາມສ່ຽງທາງດ້ານການຂາດສານອາຫານ ເຊິ່ງເປັນໂຄງການໜື່ງທີ່ມີເປົ້າໝາຍສົ່ງເສີມກິດຈະກຳສື່ສານ ການປ່ຽນແປງພຶດຕິກຳດ້ານໂພຊະນາການໃນຊຸມຊົນເພື່ອໃຫ້ມີການເຂົ້າເຖີງຂໍ້ມູນຂ່າວສານແລະນຳໄປປະຕິບັດໃນການດຳລົງຊິວິດທີ່ມີຄຸນນະພາບດີ ການກິນອາຫານຄົບໝວດ ໝູ່ ແລະ ຖືກຕ້ອງຕາມຫລັກໂພຊະນາການ ສີ່ງສຳຄັນຈະຕອ້ງມີຄວາມຮູ້ແກ່ແມ່ຍີງຖືພາ ແມ່ລູກອອ່ນ ກຸ່ມຊົນເຜົ່າ ເດັກນອ້ຍ ຄອບຄົວຜູ້ທີ່ມີຄົນພິການໃນການເຂົ້າເຖິງດ້ານການບໍລິການສຸຂະພາບຢ່າງເທົ່າທຽບ ມີຄວາມຮູ້ທາງດ້ານການເຕີບໂຕຂອງເດັກໃຫ້ມີໂພຊະນາການສົມໄວ ແລະ ມີສຸຂະພາບຮ່າງກາຍສົມສວ່ນ. ອີກດ້ານໜື່ງກໍເພື່ອຫຼຸດຜອ່ນການຂາດສານອາຫານໂດຍການສະໜັບສະໜູນແລະສົ່ງເສີມກິດຈະກຳທາງສັງຄົມໃນຂັ້ນຊຸມຊົນແລະສົ່ງເສີມກິດຈະກຳການປ່ຽນແປງພຶດຕິກຳທາງສັງຄົມໃນຊຸມຊົນແລະນຳໄປປະຕິບັດໃນການດຳລົງຊີວິດໃຫ້ມີສຸຂະພາບທີ່ດີ.
 
ຕອນທ້າຍທ່ານປະທານກໍໄດ້ໂອ້ລົມໃຫ້ທິດຊີ້ນຳຕໍ່ຜູ້ເຂົ້າຮວ່ມໃນກອງປະຊຸມຈົ່ງເອົາໃຈໃສ່ສືກສາຄົ້ນຄວ້າ ນຳເອົາຄວາມຮູ້ທີ່ຖອດຖອນໄດ້ລົງໄປຈັດຕັ້ງປະຕິບັດຢູ່ຂັ້ນຮາກຖານທອ້ງຖີ່ນຂອງໃຜລາວເພື່ອໃຫ້ທຸກຄົນມີສຸຂະພາບທີ່ດີແຂງແຮງ ປຽ່ນແປງການກີນອາຫານເພື່ອຫຼຸດຜອ່ນການຂາດສານອາຫານໂດຍສະເພາະແມ່ຍີງທີ່ຖືພາແລະແມ່ລູກອອ່ນ ເດັກນ້ອຍຕ້ອງໄດ້ຮັບສານອາຫານຢ່າງພຽງພໍ.
APL+ ຈັດກອງປະຊຸມ ທົບທວນຄືນ ແລະ ປັບປຸງແຜນຍຸດທະສາດໃໝ່

APL+ ຈັດກອງປະຊຸມ ທົບທວນຄືນ ແລະ ປັບປຸງແຜນຍຸດທະສາດໃໝ່

ກອງປະຊຸມທາງໄກ ແລະ ຊ້ອງຫນ້າ ເພື່ອທົບທວນຄືນ ແລະ ປັບປຸງແຜນຍຸດທະສາດໃໝ່ຂອງສະມາຄົມເຄືອຂ່າຍຜູ້ຕິດເຊື້ອເຮສໄອວີ/ເອດ (APL+) ໄດ້ຈັດຂື້ນ ໃນວັນທີ 12 ເມສາ 2022 ທີ່ ໂຮງແຮມລາວພລາຊ່າ ນະຄອນຫຼວງວຽງຈັນ ໂດຍການເປັນປະທານຂອງ ທ່ານ ດຣ.ພູທອນ ສຸດທະລັກ ຫົວໜ້າສູນຕ້ານເອດ ແລະ ພະຍາດຕິດຕໍ່ທາງເພດສຳພັນ ທ່ານທອງແດງ ສີລາກຸນ ຕາງໜ້າອົງການສະຫະປະຊາຊາດຕ້ານເອດປະຈຳລາວ ແລະ ທ່ານກໍລະກັນ ທິບພະວົງ ປະທານສະມາຄົມເຄືອຂ່າຍຜູ້ຕິດເຊື້ອເຮສໄອວີ/ເອດ ພ້ອມດ້ວຍ ຕາງໜ້າອົງການຈັດຕັ້ງສັງຄົມລາວ(LCSO) UN Agencies ແລະ ສາກົນ(INGO) ທີ່ປຶກສາຕ່າງປະເທດ ອາສາສະໝັກ ທີມງານຂອງສະມາຄົມ ແລະ ພາກສ່ວນທີ່ກຽວຂ້ອງເຂົ້າຮ່ວມຢ່າງພ້ອມພຽງ.
 
ເຊິ່ງໃນທີປະຊຸມ ທ່ານ ດຣ.ທອງແດງ ສີລາກຸນ ໄດ້ກ່າວຄວາມສຳຄັນ ແລະ ຈຸດປະສົງລວມ ໃນການປັບປຸງແຜນຍຸດທະສາດຂອງສະມາຄົມເຄືອຂ່າຍ ຮ່ວມ ກັບອົງການສະຫະປະຊາດຊາດຕ້ານເອດ ແລະ ທີ່ປຶກສາຈາກຕ່າງປະເທດວ່າມີຂໍ້ສະດວກຂໍ້ຫຍຸ້ງຍາກແນວໃດເພື່ອໃຫ້ແຜນຍຸດທະສາດ ຫຼື ແຜນດຳເນີນງານສະບັບໃໝ່ນີ້ສອດຄ່ອງ ແລະ ສະໜັບສະໜູນທິດທາງນະໂຍບາຍແຫ່ງຊາດຕ້ານເອດ.ທັງນີ້ກໍເພື່ອໃຫ້ນຳໄປສູ່ຜົນປະໂຫຍດສູງສຸດແກ່ຜູ້ຕິດເຊື້ອເຮສໄອວີ/ເອດ ໃນ ສປປ.ລາວ.
 
ແລະ ນອກຈາກ ສອດຄ່ອງ ແລະ ສະໜັບສະໜູນນະໂຍບາຍແຫ່ງຊາດຕ້ານເອດໃນປະເທດລາວແລ້ວ ແຜນຍຸດທະສາດຂອງເຮົານີ້ ມັນຕ້ອງສອດຄ່ອງກັບແຜນຍຸດທະສາດ ຫຼື ທິດທາງຖະແຫຼ່ງການ ຂອງອົງການສະຫະປະຊາດຕ້ານເອດຂອງໂລກ ວ່າດ້ວຍການສິ້ນສຸດໂລກເອດໃນປີ 2030 ເຊິ່ງເນື້ອໃນຖະແຫຼງການນັ້ນເວົ້າເລື່ອງ ວິທີການເຮັດແນວໃດໃຫ້ຜູ້ຕິດເຊື້ອເຂົ້າເຖິງການບໍລິການ ການສ້າງຄວາມເຂັ້ມແຂງ ການແກ້ໄຂປັນຫາ ການຂາດການຕິດຕາມ ການຕາຍ ແລະ ປັນຫາການຈຳແນກລັງກຽດ ທຸກສິ່ງທຸກຢ່າງ ແມ່ນເຮັດແນວໃດໃຫ້ ໃຫ້ເກີດປະໂຫຍດສູງສຸດສຳຫຼັບຜູ້ຕິດເຊື້ອ.
ດຣ.ພູທອນ ສຸດທະລັກ ກ່າວມີຄຳເຫັນຕໍ່ກອງປະຊຸມ “ຄຳວ່າ ຍຸດທະສາດ ແມ່ນມີຄວາມໝາຍອັນເລິກເຊິ່ງ ຖ້າເຮົາເຮັດວຽກໃດວຽກໜຶ່ງ ຖ້າບໍ່ມີຍຸດທະສາດ ເຮົາຈະບໍ່ສາມາດບັນລຸເປົ້າໝາຍທີ່ເຮົາວາງໄວ້ໄດ້ ເພາະວ່າຍຸດທະສາດ ມັນແມ່ນ ແນວທາງ ແມ່ນທິດຊີ້ນຳເພື່ອຈະເຮັດແນວໃດໃຫ້ເຮົາບັນລຸເປົ້າໝາຍ ແລະ ເພື່ອໃຫ້ຍຸດທະສາດມີຄວາມໝັກແໜ້ນ ແລະ ປະກົດຜົນເປັນຈິງ ເຮົາຕ້ອງພ້ອມກັນ ສ້າງແຜນງານຂື້ນມາ ເພື່ອໃຫ້ຍຸດທະສາດນັ້ນບັນລຸເປົ້າໝາຍຕາມທີ່ເຮົາກຳນົດໄວ້.ແຜນຍຸດທະສາດໃນມື້ນີ້ ຈະເປັນບ່ອນອິງ ໃນການຈັດຕັ້ງປະຕິບັດແຜນງານ ແລະ ເປັນເຄື່ອງມືໃນການລະດົມທຶນຂອງພວກເຮົາ ອັນນີ້ຖືວ່າມີຄວາມໝາຍສຳຄັນທີ່ສຸດ.
 
ມາຮອດປະຈຸບນີ້ ບ້ານເຮົານອກຈາກຈະປະເສີນໜ້າກັບໂຄວິດ-19 ແລ້ວ ເຊື້ອເຮສໄອວີມັນກໍຍັງຄຽງຄູ່ໄປກັບການລະບາດຂອງໂຄວິດ ແຕ່ລະປີເຮົາພົບຜູ້ຕິດເຊື້ອບໍ່ຕ່ຳກວ່າ 1500 ກວ່າຄົນ ອັນນີ້ແມ່ນເຮສໄອວີ ຍາມໃດກໍເປັນໄພຄຸກຄາມຕໍ່ພວກເຮົາຕະຫຼອດມາ. ແລະ ການລະບາດພະຍາດໂຄວິດ ເຮັດໃຫ້ເຮົາເຮັດວຽກບໍ່ໄດ້ຕາມແຜນການ ບໍ່ໄດ້ຈັດຕັ້ງປະຕິບັດຕາມແຜນທີ່ວາງໄວ້ ແລະ ການເຂົ້າເຖິງກຸ່ມເປົ້າໝາຍກໍບໍ່ໄດ້ຕາມເປົ້າໝາຍແຫ່ງຊາດ ເຂົ້າເຖິງພຽງແຕ່ 4% ເຂົ້າເຖິງນ້ອຍບໍ່ແລ້ວ ເຮົາຍັງພົບຜູ້ຕິດເຊື້ອສູງເຖີງ 14% ອັນນີ້ຊີ້ໃຫ້ເຫັນວ່າ ໂຄວິດລະບາດມັນກໍມີຜົນກະທົບຕໍ່ວຽກງານຕອບໂຕ້ເຮົາເຊັ່ນດຽວກັນ.ແຕ່ມື້ນີ້ຂ້າພະເຈົ້າດີໃຈທີ່ມີແຜນຍຸດທະສາດ ເພື່ອເຮັດແນວໃດໃຫ້ຜູ້ທີ່ຖືກຜົນກະທົບໄດ້ຮັບການບໍລິການທີ່ມີຄຸນນະພາບ ແລະ ເຂົ້າເຖີງງ່າຍ.
 
ຫຼັງຈາກນັ້ນ ທ່ານພັທະມິດ ແສງປັນຍາ ຜູ້ອຳນວຍການ ສະມາຄົມເຄືອຂ່າຍຜູ້ຕິດເຊື້ອເຮສໄອວີ/ເອດ ນຳສະເໜີ ພາບລວມການການຮ່ວມມືປັບປຸງແຜນຍຸດທະສາດກັບໜ່ວຍງານທີ່ກຽວຂ້ອງ ເຊິ່ງຍຸດທະສາດຂອງຂອງສະມາຄົມ ຫຼັກໆແມ່ນເພື່ອປັບປຸງຄຸນນະພາບຊີວິດການເປັນຢູ່ ບໍ່ວາຈະເປັນວຽກງານໂພສະນາການ ການສຶກສາ ແລະ ການສົ່ງເສີ່ມວິຊາຊີບ ຫຼື ການຫາລາຍໄດ້ໃຫ້ຜູຕິດເຊື້ອເຮສໄອວີເອດໃນສປປ.ລາວ. ຕໍ່ຈາກນັ້ນ,ເປັນວາລະການປະກອບຄວາມຄິດເຫັນຈາກຜູ້ເຂົ້າຮ່ວມ ແລະ ອົງການທີ່ກ່ຽວຂ້ອງ ທັງອອນລາຍ ແລະ ຊ້ອງໜ້າ ມີຄວາມຄິດເຫັນຈາກຕາງໜ້າອົງການຈັ້ງຕັ້ງສັງຄົມລາວ ແລະ ສາກົນຫຼາຍທ່ານທີ່ສຳຄັນ ແລະ ເປັນປະໂຫຍດຫຼາຍ ເພື່ອປະກອບສ່ວນເຂົ້າໃນການປັບປຸງແຜນຍຸດທະສາດຂອງພວກເຮົາໃຫ້ມີຄວາມສົມບູນຂື້ນເຕີ່ມ.
APLPlusLaos ຮ່ວມກັບ ສູນກາງຊາວໜຸມ ປະຕິວັດລາວ ກົມຂະບ່ວນການ ຢ້ຽມຢາມອົງການຈັດຕັ້ງສັງຄົມ ແລະ ຫ້ອງການຊາວໜຸ່ມແຂວງຊຽງຂວາງ

APLPlusLaos ຮ່ວມກັບ ສູນກາງຊາວໜຸມ ປະຕິວັດລາວ ກົມຂະບ່ວນການ ຢ້ຽມຢາມອົງການຈັດຕັ້ງສັງຄົມ ແລະ ຫ້ອງການຊາວໜຸ່ມແຂວງຊຽງຂວາງ

ໃນລະຫວ່າງວັນທີ 23-25 ມີນາ 2022 ຜ່ານມານີ້ ທ່ານ ພັນທະມິດ ແສງປັນຍາ ຜູ້ອຳນວຍການ ສະມາຄົມເຄືອຂ່າຍຜູ້ຕິດເຊື້ອເຮສໄອວີ/ເອດ ແລະ ທ່ານນາງ ຊາລັນຍາ ແກ້ວຈອມສີ ຕ່າງໜ້າຈາກສູນກາງຊາວໜຸ່ມ ກົມຂະບວນການ ພ້ອມດ້ວຍຄະນະທັງສອງພາກສ່ວນ ໄດ້ລົງພື້ນທີ່ ຢ້ຽມຢາມອົງການຈັດຕັ້ງທາງສັງຄົມ ແລະ ຫ້ອງການຊາວໜຸ່ມແຂວງຊຽງຂວາງ ເພື່ອຂໍການສະໜັບສະໜູນ ແລະ ຫາຊ່ອງທາງການແກ້ໄຂປະກົດການຫຍໍ້ທໍ້ທາງສັງຄົມ ເພື່ອສຶກສາການເຮັດວຽກຮ່ວມກັບຊາວໜຸ່ມທີ່ໄດ້ປະສິດຕິພາບຈາກບັນດາອົງການຈັດຕັງທາງສັງຄົມທີ່ຢູ່ໃນແຂວງຊຽງຂວາງນັ້ນ ແລະ ເພື່ອການວາງແຜນພັດທະນາຮ່ວມກັນໃນອານາຄົດລະຫວ່າງຫ້ອງການຊາວໜຸ່ມແຂວງ ແລະ ສະມາຄົມ.
 
ທີມງານລົງພື້ນທີ່ຢ້ຽມຢາມ ໄດ້ຮັບການຕ້ອນຮັບຢ່າງອົບອຸ່ນ ແລະ ເປັນກັນເອງ ໂດຍ ເນື້ອໃນການສົນທະນາ ຕາງໜ້າ ອົງການຈັດຕັ້ງທາງສັງຄົມ ແລະ ຫ້ອງການຊາວໜຸ່ມຂັ້ນແຂວງ ໄດ້ໃຫ້ຮູ້ ສະພາບການຕິດເຊື້ອເຮສໄອວີພາຍໃນແຂວງຊຽງຂວາງ, ວຽກງານການສະກັດກັ້ນພະຍາດເອດ,ການສ້າງອາຊີບໃຫ້ແກ່ສະມາຊິກຜູ້ຕິດເຊື້ອ ໃນໄລຍະທີ່ຜ່ານມາ ແລະ ຂໍ້ສະເໜີແນະແຜ່ນງານຮ່ວມກັນກັບສະມາຄົມໃນອະນາຄົດ.
 
ທ່ານ ສົມໜັກ ໄຊປັນຍາ ຮອງເລຂາຊາວໜຸ່ມແຂວງຊຽງຂວາງ ໄດ້ມີຄໍາເຫັນຕໍ່ກັບວຽກງານຕ້ານເອດວ່າ: ໃນໄລຍະທີ່ຜ່ານມາທາງຄະນະເຮົາໄດ້ເຄື່ອນໄຫວກິດຈະກຳຂອງໂຄງການເປັນເວລາ 3-4 ປີ ວ່າດ້ວຍການລົງໂຄສະນາໃຫ້ຄວາມຮູ້ພື້ນຖານກ່ຽວກັບ ການປ້ອງກັນເຊື້ອເຮສໄອວີ ການສະກັດກັ້ນການໃຊ້ສານເສບຕິດ ການຂັບຂີ່ປອດໄພ ແລະ ຫົວຂໍ້ກ່ຽວກັບສຸຂະພາບອື່ນໆ. ສະນັ້ນແລ້ວທາງເຮົາເອງກ້າເວົ້າໄດ້ວ່າ ພວກເຮົາມີວິຊາການທີ່ມີຄວາມພ້ອມໃນເລື່ອງຂອງຂໍ້ມູນກ່ຽວກັບເລື່ອງສຸຂະພາບ ແລະ ຮູບແບບການລົງໂຄສະນາຂັ້ນຊຸມຊົນທີ່ໄດ້ຮັບການຍອມຮັບຈາກຊຸມຊົນຫຼາຍພໍສົມຄວນ.
 
ພ້ອມກັນນັ້ນເພີ່ນຍັງໄດ້ສະເໜີແຜນງານຮ່ວມກັນໃນອານາຄົດກໍຄື: ຖ້າຫາກທາງສະມາຄົມມີແຜນທີ່ຈະສະໜັບສະໜູນໃຫ້ແຂວງຊຽງຂວາງ ມີຈຸດຈ່າຍຢາເພື່ອອໍານວຍຄວາມສະດວກໃຫ້ແກ່ສະມາຊິກຜູ້ຕິດເຊື້ອພາຍໃນແຂວງ ເພື່ອຫຼຸດຜ່ອນຄ່າໃຊ້ຈ່າຍການໄປຕໍ່ຢາຂ້າມແຂວງ. ແຕ່ປັນຫາຄາດວ່າ ຜູ້ຕິດເຊື້ອເອງຍັງບໍ່ສາມາດຍອມຮັບຕົວເອງ ແລະ ຂາດຄວາມເຊື່ອໝັ້ນຕໍ່ແພດໝໍໃນການຮັກສາຄວາມລັບ ຈຶ່ງຢາກໃຫ້ສະມາຄົມສືບຕໍ່ວຽກງານໂຄສະນາໃຫ້ຄວາມຮູ້ພື້ນຖານກ່ຽວກັບເຊື້ອເຮສໄອວີ ໃຫ້ຄົນໃນຊຸມຊົນເຂົ້າໃຈ ຍອມຮັບ ປາສະຈາກການຈໍາແນກ ແລະ ລັງກຽດກຸ່ມຜູ້ຕິດເຊື້ອ ທຸກຄົນໃນສັງຄົມ ສາມາດຢູ່່ຮ່ວມກັນຢ່າງມີຄວາມສຸກ ແລະ ມີຄຸນຄ່າໄດ້.
 
ນອກຈາກນັ້ນ,ພວກເຮົາຍັງໄດ້ສືບຕໍ່ລົງຢ້ຽມຢາມສະມາຄົມເຂົ້າໄກ່ນ້ອຍ ໂດຍການຕ້ອນຮັບຢ່າງອົບອຸ່ນ ຂອງ ທ່ານນາງ ສົມໃຈ ສິມມາວົງ ຮອງຜູ້ອໍານວຍການສະມາຄົມ. ເພີ່ນໄດ້ແລກປ່ຽນເຖິງບັນຫາທີ່ໄດ້ພົບພໍ້ໃນການລົງເຮັດວຽກໃນຊຸມຊົນ ຄື : ເນື່ອງຈາກບ້ານເປົ້າໝາຍທີ່ສະມາຄົມເຂົ້າໄກ່ນ້ອຍໄດ້ລົງໄປເຮັດກິດຈະກຳນັ້ນ ຂາດແຄນ ແຮງງານໄວໜຸ່ມ ເຊິ່ງຍັງເປັນຫາໜຶ່ງທີ່ໜ້າກັງວົນ ເນື່ອງຈາກໂຄງການນີ້ ຕ້ອງການ ຄວາມຢືນຍົງເພື່ອໃຫ້ຄົນຮຸ້ນຫຼັງຫຼືໄວໜຸ່ມໄດ້ສືບຖອດ ຮັກສາພັນເຂົ້າໄກ່ນ້ອຍບໍໃຫ້ສູນຫາຍ.
 
ຫຼງຈາກນັ້ນ ຄະນະເດີນທາງຢ້ຽມຢາມ ໄດ້ແລກປ່ຽນຄໍາເຫັນເຊິ່ງກັນ ແລະ ທ່ານ ຊາລັນຍາ ແກ້ວຈອມສີ ຕາງໜ້າ ຈາກກົມຂະບວນການ ສູນກາງຊາວໜຸ່ມ ມີຄວາມເຫັນອີກວ່າ ຈະຕ້ອງໄດ້ເຮັດວຽກຮ່ວມກັບຄະນະຊາວໜຸ່ມໃຫ້ຫຼາຍຂື້ນເພື່ອເປັນການຍົກລະດັບຄວາມສໍາຄັນໃຫ້ກັບຊາວໜຸ່ມແລະອາສາສະໝັກຂັ້ນບ້ານໃຫ້ເຫັນຄວາມສໍາຄັນກ່ຽວກັບບັນຫາດັ່ງກ່າວວ່າ ມັນສໍາຄັນຕໍ່ເສດຖະກິດຂັ້ນບ້ານ ເມືອງ ແຂວງເຮົາຄືແນວໃດ.
ພິທີເຊັນບົດບັນທຶກຂໍ້ຕົກລົງການໃຫ້ທຶນແກ່ 3 ສະມາຄົມ

ພິທີເຊັນບົດບັນທຶກຂໍ້ຕົກລົງການໃຫ້ທຶນແກ່ 3 ສະມາຄົມ

[English text below]
ຂໍຂອບໃຈ ມາຍັງ ອົງການ Caritas, EU, ARMI ທີ່ໃຫ້ໂອກາດ APL+ ເປັນ 1ໃນ 4 ສະມາຄົມ ຖືກຄັກເລືອກຮັບທຶນເພື່ອປະຕິບັດວຽກງານໂພຊະນາການ ແຂວງບໍລິຄຳໄຊ
ອົງການແຄຣິຕັສລຸກຊຳບວກປະຈຳລາວ ໄດ້ຮັບທຶນຈາກສະຫະພາບເອີຣົບ European Union in Laos ແລະ ລັດຖະບານປະເທດລຸກຊຳບວກ Luxembourg Embassy in Laos ເພື່ອຈັດຕັ້ງປະຕິບັດໂຄງການເສີມສ້າງຄວາມເຂັ້ມແຂງໃນການຈັດຕັ້ງປະຕິບັດວຽກງານໂພຊະນາການຕາມແຜນຍຸດທະສາດແຫ່ງຊາດ. ໂຄງການດັ່ງກ່າວໄດ້ມີແຜນການຈັດຕັ້ງປະຕິບັດຮ່ວມກັນກະຊວງສາທາລະນະສຸກ ແລະ ອົງການຈັດຕັ້ງສັງຄົມລາວ. ສະເພາະ 4 ອົງການຈັດຕັ້ງສັງຄົມລາວ ລວມມີ: ສະມາຄົມເຄືອຂ່າຍຜູ້ຕິດເຊື້ອເຮສໄອວີ/ເອດ (ສຄອ); ສະມາຄົມຊຸມຊົນເພື່ອຊີວິດ ແລະ ສິ່ງແວດລ້ອມ (ສຊສ); ສະມາຄົມ ພັດທະນາບົດບາດຍິງ-ຊາຍ (ສພຍຊ); ສະມາຄົມ ຊ່ວຍເຫຼືອຟື້ນຟູຄຸນນະພາບຊີວິດ (ສຊຟຄ) ແມ່ນໄດ້ຮັບທຶນຍ່ອຍສະໜັບສະໜູນ ຈຳນວນລວມ 150,000 ເອີໂຣ ເພື່ອຈັດຕັ້ງປະຕິບັດກິດຈະກຳໂພຊະນາການຮ່ວມກັບຂັ້ນທ້ອງຖິ່ນ.
 
ໂດຍຈຸດປະສົງຂອງການໃຫ້ທຶນຍ່ອຍກັບ 4 ສະມາຄົມ ແມ່ນເພື່ອຫຼຸດຜ່ອນອັດຕາການຂາດສານອາຫານ ໂດຍຜ່ານກິດຈະກຳການສື່ສານ-ການປ່ຽນແປງພຶດຕິກຳທາງສັງຄົມໃນ 37 ບ້ານເປົ້າໝາຍຂອງ 3 ເມືອງໃນ 3 ແຂວງເປົ້າໝາຍຄື: 10 ບ້ານຂອງເມືອງທຸລະຄົມ, ແຂວງວຽງຈັນ; 10 ບ້ານຂອງເມືອງໄຊຈຳພອນ, ແຂວງບໍລິຄຳໄຊ ແລະ ອີກ 17 ບ້ານຂອງເມືອງຜາໄຊ, ແຂວງຊຽງຂວາງ. ຄາດຄະເນ ປະຊາກອນຈຳນວນ ປະມານ 28,109 ຄົນ (ເພດຍິງປະມານ 14,197 ຄົນ) ຈະໄດ້ຮັບຮູ້ຂໍ້ມູນຂ່າວສານກ່ຽວກັບການປ່ຽນແປງພຶດຕິກຳທາງສັງຄົມໃນການປຸງແຕ່ງ ແລະ ບໍລິໂພກອາຫານໃຫ້ຖືກວິທີ.
 
Caritas Luxembourg in Laos received a grant from European Union in Laos and the Luxembourg Embassy in Laos to implement nutrition activities in cooperation with the Ministry of Health and Lao Civil Society organizations (LCSOs). The four selected LCSOs, including the Association of People living with HIV/AIDS (APL+), the Community Association for Salvation and Environment (CASE), the Gender Development Association (GDA) and the Quality of Life Association (QLA) received a sub-grant from the total amount of 150.000 Euros to implement nutrition activities in collaboration with local partners.
The sub-grant will contribute to the reduction of malnutrition rates through the implementation of Social Behaviour Change Communication (SBCC) activities in 37 target villages spread over 3 districts in 3 target provinces as follows: 10 villages in Thulakhom district (Vientiane Province); 17 villages in Xaychamphone district (Bolikhamxay Province) and 10 villages in Phaxay district (Xiengkhuang Province). About 28,109 people (14,197 women) will benefit from the activities through better information on nutrition and social behaviour change communication in cooking and dietary practices.
 
ມູນນິທິດູແລປິ່ນປົວພະຍາດເອດ ສຶບຕໍ່ສະໜັບສະໜູນວຽກງານສະກັດກັ້ນປິ່ນປົວຜູ້ຕິດເຊື້ອເຮສໄອວີ

ມູນນິທິດູແລປິ່ນປົວພະຍາດເອດ ສຶບຕໍ່ສະໜັບສະໜູນວຽກງານສະກັດກັ້ນປິ່ນປົວຜູ້ຕິດເຊື້ອເຮສໄອວີ

ພິທີເຊັນບົດບັນທຶກຄວາມເຂົ້າໃຈ (MOU) ລະຫວ່າງ ທ່ານ ດຣ. ພູທອນ ສຸນທະລັກ ຫົວໜ້າສູນຕ້ານເອດ ແລະ ພະຍາດຕິດຕໍ່ທາງເພດສຳພັນ ຕາງໜ້າກະຊວງສາທາລະນະສຸກ ແລະ ທ່ານນາງ ດຣ. ຈິນຕະນາ ສົມຄະເນ ຜູ້ປະສານງານໂຄງການ ມູນນິທິປິ່ນປົວພະຍາດເອດ (AHF) ປະຈຳລາວ ໃນ “ໂຄງການຮ່ວມມືເພື່ອປັບປຸງວຽກງານການສະກັດກັ້ນ ແລະ ຕ້ານເຊື້ອເຮສໄອວີ/ພະຍາດເອດ ແລະ ພະຍາດຕິດຕໍ່ທາງເພດສຳພັນ ຢູ່ ສປປ.ລາວ (ໄລຍະທີ II) 2022-2025” ສະມາຄົມເຄືອຂ່າຍຜູ້ຕິດເຊື້ອເຮສໄອວີ/ເອດ (APL+) ເປັນໜຶ່ງໃນບັນດາຜູ້ຂົ້າຮ່ວມ ແລະ ຈະເປັນຄູ່ຮ່ວມງານຈັດຕັ້ງປະຕິບັດກິດຈະກຳໃນໂຄງການດັ່ງກ່າວ.
 
ພິທີໄດ້ຈັດຂື້ນແບບຊ້ອງໜ້າ ແລະ ທາງໄກ ໃນວັນທີ 29 ມີນາ 2022 ນີ້ ທີ່ ໂຮງແຮມແລນມາກ ນະຄອນຫຼວງວຽງຈັນ ໂດຍ ພາຍໃຕ້ການເປັນປະທານຂອງ ທ່ານ ລັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ, ທ່ານ ຈິມ ສາຣາດ ຫົວໜ້າຫ້ອງການ AHF ພາກພື້ນປະຈໍາກຸງພະນົມເປັນ ປະເທດກໍາປູເຈຍ ແລະ ທ່ານ ຢູກັງ ບາວ ຮອງຫົວໜ້າຫ້ອງການ AHF ພາກພື້ນປະຈໍາກຸງປັກກິ່ງ ສປ ຈີນ ພ້ອມດ້ວຍບັນດາຄະນະກົມ ຫົວໜ້າພະແນກ ອຳນວຍການໂຮງໝໍ ຫົວໜ້າສູນ ຫົວໜ້າສະມາຄົມ ເຂົ້າຮ່ວມ.
 
ທ່ານ ລັດຕະນະໄຊ ເພັດສຸວັນ ກ່າວວ່າ: ການເຊັນບົດບັນທຶກຄວາມເຂົ້າໃຈໃນຄັ້ງນີ້ມີຄວາມສຳຄັນ ຊຶ່ງເປັນໜຶ່ງໃນແຜນງານການຈັດຕັ້ງປະຕິບັດວຽກງານສະກັດກັ້ນ ແລະ ຕ້ານເຊື້ອເຮສໄອວີ/ພະຍາດເອດ 4 ປີ (2022-2025) ຊຶ່ງຈຸດປະສົງຫຼັກເພື່ອເພີ່ມທະວີການເຂົ້າເຖິງວຽກງານປ້ອງກັນ ແລະ ການກວດເລືອດ ເພື່ອຊອກຫາການຕິດເຊື້ອ HIV/Shiplaylis ໃນກຸ່ມປະຊາກອນທີ່ມີຄວາມສ່ຽງ ແລະ ສົ່ງຕໍ່ຜູ້ທີ່ເຫັນວ່າມີຜົນບວກ ເພື່ອເຂົ້າຮັບການປິ່ນປົວ, ຄຽງຄູ່ກັບການຕໍ່ສູ້, ຄວບຄຸມພະຍາດໂຄວິດ-19 ພວກເຮົາຍັງສູ້ຊົນບັນລຸໃຫ້ໄດ້ເປົ້າໝາຍແບບເລັ່ງລັດ (Fast-Tract) ຂອງອົງການສະຫະປະຊາຊາດຕ້ານເອດ (UNAIDS) ຄື: ພາຍໃນປີ 2025 ຈະຕ້ອງບັນລຸເປົ້າໝາຍໃໝ່ໃນການປິ່ນປົວໃຫ້ໄດ້ 95-95-95 ແລະ ພ້ອມນີ້ຈະກຽມພ້ອມຢຸດຕິການແຜ່ລະບາດຂອງເຊື້ອເຮສໄອວີ ແລະ ບັນລຸເປົ້າໝາຍການພັດທະນາແບບຍືນຍົງ (SDC) ໃນປີ 2030 ຊຶ່ງແມ່ນຄວາມຮັບຜິດຊອບຂອງພວກເຮົາ ຊຶ່ງມີຄວາມທ້າທາຍຫຼາຍທີ່ຈະບັນລຸໄດ້.
 
ປັດຈຸບັນປະເທດຂອງພວກເຮົາປະສົບຂໍ້ຫຍຸ້ງຍາກຫຼາຍດ້ານ ແລະ ມີບັນຫາທາງດ້ານງົບປະມານ, ດ້ານການຕອບໂຕ້ຕໍ່ເຊື້ອເຮສໄອວີ ພະຍາດເອດ ຍັງມີຫຼາຍສິ່ງທ້າທາຍຄື: ແຮງງານເຄື່ອນຍ້າຍກໍມີຫຼາຍ ເຮັດໃຫ້ມີຄວາມສ່ຽງຕໍ່ການຕິດເຊື້ອເຮສໄອວີ, ແຕ່ລະປີຍັງມີຜູ້ຕິດເຊື້ອຫຼາຍກວ່າ 1.500 ຄົນ, ກຸ່ມຊາຍມີເພດສໍາພັນກັບຊາຍ ຍັງຕິດເຊື້ອສູງ, ການສົ່ງເຊື້ອຈາກແມ່ຫາລູກກໍເຫັນວ່າມີທ່າອ່ຽງສູງຂຶ້ນ, ນໍ້າຢາກວດເລືອດຊອກຫາການຕິດເຊື້ອເຮສໄອວີ ຍັງບໍ່ທັນພຽງພໍ, ຜູ້ຕິດເຊື້ອເຮສໄອວີ ແລະ ຜູ້ທີ່ເປັນພະຍາດເອດຍັງຂາດການຕິດຕາມຫຼາຍ ແລະ ການກິນຢາກໍຍັງບໍ່ທັນຕໍ່ເນື່ອງ ແລະ ເປັນປົກກະຕິ, ຍ້ອນມີສະພາບການລະບາດຂອງພະຍາດໂຄວິດ ແລະ ຂາດງົບປະມານໃນການເດີນທາງເຂົ້າມາຮັບການບໍລິການກວດສຸຂະພາບ ແລະ ມາຮັບຢາ.ໃນປີ 2022 ມີຜູ້ທີ່ຕ້ອງການປິ່ນປົວດ້ວຍຢາ ARV ເພີ່ມຂຶ້ນ ຊຶ່ງປັດຈຸບັນທົ່ວປະເທດຜູ້ມີໜ້າກິນຢາຕົວຈິງພຽງແຕ່ 8.864 ຄົນ.
 
ໂຄງການ AHF ໄດ້ໃຫ້ການສະໜັບສະໜູນດ້ານງົບປະມານໃນການເຂົ້າເຖິງກຸ່ມປະຊາກອນທີ່ມີຄວາມສ່ຽງຕໍ່ການຕິດເຊື້ອເຮສໄອວີ ໃນໄລຍະຜ່ານມາ ໂດຍສະເພາະແມ່ນວຽກງານປິ່ນປົວດູແລຜູ້ຕິດເຊື້ອເອດນັບແຕ່ປີ 2013-2021 ແລະ ໃນມື້ນີ້ທາງໂຄງການ AHF ໄດ້ສືບຕໍ່ສະໜັບສະໜູນດ້ານງົບປະມານ 21 ຕື້ 651 ລ້ານກວ່າກີບໃນອີກ 4 ປີຕໍ່ໜ້າ (2022-2025) ຊຶ່ງເປັນການຊ່ວຍເຫຼືອເພື່ອປັບປຸງວຽກງານສະກັດກັ້ນ ແລະ ຕ້ານເຊື້ອເຮສໄອວີ/ພະຍາດເອດຢູ່ລາວໃຫ້ມີຄວາມເຂັ້ມແຂງ.
loLao